Edder & Galle

Sist kamp var det skikkeleg dårleg stemning i Edder & Galle. No slår Bryne Stabæk 2–0 på heimebane, spelar underhaldande fotball, og plutseleg er stemninga og trua tilbake hos nokre av oss. Er vi verkeleg så enkle? Det får de avgjere. For Bryne leverer ein solid kamp mot Stabæk, nesten utruleg etter det vi såg borte mot Strømmen. Samstundes går fleire av dei andre resultata vår veg, og dermed er Bryne for fullt med i kampen om kvalifiseringsplassen til opprykk. Anonyme spørsmål er tilbake, og sjølvsagt dukkar katten til Hobberst opp igjen. Det måtte nesten skje. No ventar Bjarg i cupen før Bryne set kursen mot Bergen og Åsane Arena for seriekamp mot Åsane. Det blir ingen enkel kamp mot eit lag som kan skapa trøbbel, men Per Tore har trua på at Bryne kan ta med seg tre poeng heim. God stemning? Me får sjå kor lenge det varer.

I kveldens episode av Edder & Galle skal vi innom tre hovudpunkt. Først: Vi tek ein kjapp gjennomgang av kampen mot Strømmen. Det var ikkje all verda å hente frå den kampen, så for podkasten sin del er det eigentleg heilt greitt at vi spelar inn episoden tre dagar etter kampslutt og ikkje rett etter. Deretter: Vi køyrer ein ny versjon av «anonyme spørsmål». Denne gongen har vi samla inn det folk har lurt på den siste tida, og kokt det ned til seks sentrale tema som vi diskuterer. Til slutt: Vi skal sjå litt på situasjonen til Stabæk og Bryne. Stabæk er med der oppe, medan Bryne framleis har heng på kvalik. Samtidig har Bryne gitt supportarane sine litt skumle utsikter for hausten, så der er det nok av ting å diskutere.

Bryne er vidare i cupen etter 3–0 mot Rosseland i første runde. Den to–tre minutt lange turen mellom stadionane viser heldigvis den forskjellen som bør vere mellom laga, og Bryne er dermed vidare til neste runde. Men det har vore seld spelarar, viktige spelarar. Det fekk vi kanskje eit tydeleg svar på mot FK Haugesund. For kva har salet av desse spelarane eigentleg hatt å seie for Bryne? Tapet heime mot haugalendingane er vondt nok i seg sjølv, men endå vondare er det at Bryne faktisk ikkje skapte ein einaste skikkeleg farleg situasjon gjennom heile kampen. Som alltid er det sjølvsagt duka for spørsmål frå dykk lyttarar. Vi skal blant anna innom dei nye spelarane som har kome inn i klubben, og ikkje minst: Korleis ser vegen vidare ut? Er det framleis håp om å få Per Tore si tru på kvalifisering til å slå til, eller er det Hobberst som får rett når han spår at Bryne ikkje vil klare det i år?

I denne episoden av Edder & Galle kan studio endeleg puste letta ut. Bryne har vunne på Øster Hus Arena, og det som lenge har vore omtalt som spøkelset, er endeleg dødt og begravd. Det er sjølvsagt stor glede i studio og blant alle andre som har eit hjarte som bankar for Bryne. Det er positive takter å spore på den sportslege fronten, og det er gledeleg å sjå at Bryne er på rett veg. Også i spørsmålsspalta går det godt. Det kjem inn mange gode spørsmål, og som alltid blir dei svara på, både frivillig og motvillig. Fleire ser no oppover på tabellen i lag med Per Tore, medan Hobberst framleis held fast ved si eiga tru og sine eigne tankar. No ventar ein cuprunde mot Rosseland, og den meiner podkasten bør gå greitt. Den store spenninga kjem derimot når FKH kjem på besøk til Bryne Stadion i helga. Då får vi sjå om Bryne kan byggje vidare på den positive utviklinga. Det er med andre ord mykje å glede seg til i denne episoden av Edder & Galle, med siger i ryggen, gode spørsmål på blokka og ein spennande kamp i vente.

I vekas episode av Edder & Galle er det god stemning. Spissdebut med scoring gav verkeleg optimismen eit løft, og plutseleg ligg vi nærare kvalik enn nokon gong før. Men sigeren mot Moss gav ikkje berre glede. Ein spiss gjekk ned for teljing, og det såg ikkje bra ut. Det er likevel optimisme før kampen på Øster Hus Arena. Bryne har aldri vunne der i seriesamanheng, men skal det skje, så er vi einige om at det må skje no. Forventningane er klare når vi møter eit Sandnes Ulf som ligg nede for teljing. Så får vi sjå om Bryne endeleg kan bryte den forbanninga på Øster Hus Arena.

I dagens episode av Edder & Galle går me gjennom kampen mot Sogndal. Det vart tre poeng i Saftbygda, og me kan så smått byrje å sjå oppover på tabellen, sjølv om me er einige om at Bryne kanskje er stabilt ustabile. Det har kome inn mange gode spørsmål frå lyttarane. Korleis er engasjementet rundt klubben? Korleis står det eigentleg til med motivasjonen og interessa blant supportarane der ute? Me svarar på alt, eller i alle fall prøver. Avslutningsvis ser me litt fram mot Moss, som ventar på laurdag. Hobberst må berre først få kontroll på kven som eigentleg tok over som trenar no nyleg.

I dagens episode er noko av det tekniske utstyret vårt minst like energilaust som Bryne-laget såg ut heime mot Strømsgodset. Episode blir det likevel, og vi går grundig gjennom 0–2-tapet mot drammensarane. Denne veka har det også hengt eit banner på stadion. Er det innanfor? Svaret vårt får du i episoden. Bryne har dessutan tent litt pengar på tidlegare spelarar som har funne seg nye klubbar. Betyr det at vi kan vente nye signeringar inn dørene, eller går Bryne inn i den siste delen av sesongen med den troppen dei har i dag?

For ein kveld og for ein siger! Bryne reiste til Haugesund med ei tøff oppgåve framfor seg, men tok med seg alle tre poenga heim etter ein sterk 2–1-siger mot serieleiaren. Kampen som podkastduoen frykta på førehand, enda med jubel, lettelse og tre særs viktige poeng. No rettar me blikket mot neste utfordring. Strømsgodset kjem til Bryne, og igjen ventar eit lag som ligg over oss på tabellen. Kan Bryne byggja vidare på storspelet frå Haugesund og halda den gode forma ved lag? Det har òg kome inn fleire spørsmål frå lyttarane om kampen og det som rører seg i overgangsvindauget, og me tek dei opp i denne episoden. Tune inn for mykje god fotballprat!

Bryne og Sandnes Ulf deler poenga i lokaloppgjeret på Bryne stadion. Podkastduoen legg ikkje skjul på at dei er skuffa over resultatet, og dei saknar større grep frå trenarteamet i eit forsøk på å endre kampbiletet undervegs. I spørsmålsspalta går det att at mange meiner Bryne må vere modigare frå sidelinja. Fleire etterlyser større og meir treffsikre grep under kampane, og meiner laget ofte er for seint ute med å påverke utviklinga. Det blir òg diskutert om engasjementet rundt Bryne er på veg ned. Det skuffande tilskodartalet på berre 1.800 i lokaloppgjeret blir trekt fram som ein mogleg indikator, og reiser spørsmål om interessa rundt klubben er dalande.

Etter tre strake sigrar var håpet at Bryne skulle halda fram klatringa, men på Nye Nadderud sa det stopp. 2–0-tapet mot Stabæk blir grundig analysert, og vi er samde om at det først og fremst var den svake førsteomgangen som felte Bryne. Laget var ikkje påskrudd, og Stabæk fekk sjå ut som eit lag som høyrer heime i Eliteserien , kanskje endå høgare. Det finst likevel nokre lyspunkt. Bryne løfta seg etter pause, og den betre andreomgangen kan få utslag når spelarane skal vurderast på børsen. I Tippetipset skjer det noko uvanleg: Hobberst bommar på tipset sitt, medan Per Tore endeleg treff. Diverre held ikkje det til gevinst, og no handlar det om å finna tilbake til vinnarsporet, nok ein gong. Til slutt rettar vi blikket mot helgas lokaloppgjer, når Sandnes Ulf kjem på besøk. Kva kan ein venta av rivaloppgjeret, og korleis skal Bryne slå tilbake etter tapet?

I kveldens episode av Edder & Galle oppsummerer me kampen mot Åsane. Det blir kanskje ikkje den lengste kampgjennomgangen i historia, men det viktigaste er på plass: Bryne sikra seg tre poeng, og det er det ingen som klagar på. Tippetipsa blir òg gjennomgått, og som vanleg gjekk det betre for nokre enn for andre. Panelet tek dessutan ein prat om kontraktssituasjonane i Bryne. Kven bør få ny avtale, kven står i fare for å forsvinne, og kva tenkjer eigentleg panelet om situasjonen? I ein litt meir uformell del av episoden kjem det spørsmål om fotball-VM som går føre seg no. Kven trur panelet står att som verdsmeister når alt er avgjort? Episoden blir avslutta med ein gjennomgang av den komande bortekampen mot Stabæk. Dette er ein kamp me sjølve skal på, og kva som skjer undervegs på turen kan du faktisk få ein avgjerande påverknad på. Men korleis? Det får du berre svaret på ved å høyre episoden.

I dagens episode av Edder & Galle er det mykje å jubla for etter Bryne sin sterke 3–0-siger borte mot Lyn på Bislett. Fleire spelarar skal opp på børsen, og gutane går gjennom prestasjonane som la grunnlaget for tre viktige poeng i hovudstaden. I Tippetipset går det denne gongen diverre ikkje heilt etter planen. Likevel er statistikken framleis solid, og nye tips blir sette med eit klart mål om å finna vegen tilbake til sigerssporet så raskt som mogleg. I spørjespalta blir gutane utfordra til å setja saman laget til ein tenkt 100-årsjubileumskamp. Kven fortener plass? Kven blir urettvist utelaten? Og er det nokon som slepp gjennom nålauget utan å ha gjort seg fortent til det? Her blir det garantert rom for usemje. I tillegg får panelet ei språkleg utfordring som dei, kanskje ikkje heilt overraskande, ikkje klarer å løysa under innspelinga. Det kjem òg spørsmål om den berykta vinden på Bryne stadion og kva rolle han eigentleg spelar. Til slutt rettar gutane blikket framover mot helga og den komande kampen mot Åsane. Kva ventar Bryne, og kva må til for å følgja opp den imponerande sigeren på Bislett?

Etter to kampar utan siger er vi tilbake på vinnarsporet. Hødd blir slått 1–0, og sjølv om kampen kanskje ikkje går inn i historiebøkene for den store underhaldningsverdien, leverer vi ein solid prestasjon og viser at vi er eit betre fotballag enn laget frå Ulsteinvik. Tre særs viktige poeng er i boks. Samstundes held tippetips-suksessen fram, og vi samlar inn pengar til Barnekreftforeningen. I samband med Fotballtrøyefredag skal vi òg trekkje heldige vinnarar av flotte premiar. Nokre lyttarspørsmål har òg funne vegen inn i episoden, og heilt til slutt kastar vi eit lite blikk framover mot den komande kampen mot Lyn. God lytting!

Ny episode av Edder & Galle er klar! Bryne har vore i aksjon igjen, men ny trepoengar lèt framleis venta på seg. Likevel finn Per Tore noko positivt å ta med seg frå kampen i Drammen, medan Ole Morten held litt meir igjen sjølv om også han byrjar å sjå konturane av noko. Duoen går gjennom kampen, prestasjonane og kva som må bli betre framover. I Tippetipsen klaffar det igjen for begge to, og med fulltreff denne runden er sjølvtilliten på topp før nye tips skal setjast. Ole Morten får denne gongen ansvaret for dei anonyme spørsmåla, og der ventar både forventningar, utfordringar og nokre små oppdrag. Til slutt vender blikket seg mot den komande Hødd-kampen.

Episode to denne veka er ikkje for dei fintfølande sjelene. Etter eit blytungt 3–0 tap borte mot Raufoss, haglar det med krass kritikk frå Edder & Galle-panelet. Mykje manglar i laget, og særleg trenarbenken får hard medfart på børsen denne gongen. Alarmen har gått i klubben, men det blir understreka at ansvaret ikkje kan leggjast på enkeltposisjonar åleine. Det kjem òg inn eitt og to lyttarspørsmål undervegs, og heller ikkje denne episoden slepp spissen til Bryne FK unna kritiske stikk.

På sjølvaste nasjonaldagen kjem ein ny episode av Edder & Galle. I denne episoden blir det sjølvsagt slakting av ein spelar sitt val denne veka, og me går grundig gjennom kampen på fotballens nasjonaldag. Me meiner Bryne Stadion viste seg frå ei god side. Her er det absolutt mogleg å skapa fotballfest 16.mai. Det blir òg nok ein gong klirrande mynt i tippespalta. Berre å tune inn! Ny kamp ventar alt onsdag, så dette er den første av to episodar denne veka.

Bryne tok endeleg med seg alle poenga heim etter ein sterk bortekamp mot Moss på Melløs. Dei raudkledde opna kampen i forrykande tempo og gjekk til pause med ei solid 3–0-leiing. Sjølv om det blei nokre nervøse minutt på tampen og eit par ekstra tankar i overtida, heldt Bryne unna og sikra ein etterlengta triumf på Austlandet. I denne episoden av Edder & Galle går podkast-duoen gjennom kampen og svarar på det alle lyttarane lurer på: Er dei eigentleg nøgde med det dei fekk sjå på Melløs? Stemninga er i alle fall god når praten kjem inn på spalta «Tippetips», der duoen igjen traff blink og held fram den sterke starten. Til slutt rettar dei blikket framover mot neste utfordring: kamp på fotballens nasjonaldag, 16. mai, heime mot Strømmen. Kan Bryne byggja vidare på sigersrusen heime på Bryne Stadion?

Ein ny episode av Edder & Galle startar med det som skulle vere ein koseleg kveld for Bryne, men som sjølvsagt ikkje fekk lov til å vere det. 3–0 mot Sogndal burde vere spikra og klart, ferdig snakka, takk for i dag. I staden blir det to baklengs langt inn i overtida, og plutseleg sit alle og stirer tomt ut i lufta og lurer på kvifor dette alltid skjer. Det luktar ikkje berre svidd, det luktar litt sjølvpåført dramatikk. I spalta for anonyme spørsmål kjem det inn mykje av det same: kva er det eigentleg som føregår i dette laget? Er det konsentrasjonen som forsvinn, eller er det berre ein slags kollektiv trong til å gjere kampane unødvendig spennande? Panelet prøver å svare så godt dei kan, men det blir med eit forsiktig nivå. Ingen går heilt i strupen på nokon, sjølv om det kanskje klør litt. Så var det tippe-spalta, ja. Eit lite lysglimt i alt dette. Starten i år har faktisk vore brukbar, i alle fall om ein justerer for fjoråret, og det gjer dei veldig gjerne. Sjølvtilliten er tilbake, i alle fall høg nok til å setje nye tips utan å rødme altfor mykje. Til slutt rettar dei blikket mot neste kamp, borte mot Moss på Melløs. Det blir snakka om eit lag som kjem til å gi Bryne kamp, og at dette neppe er plassen for å eksperimentere med nye måtar å sleppe inn mål på heilt på slutten. Kanskje oppskrifta denne gongen er å spele i 90 minutt pluss tillegg, ikkje berre 85. Det hadde vore ein fin start.

I denne episoden av Edder & Galle tek me eit tungt oppgjer med kampen mot Odd. Me starta godt, med tru og energi, men så kom utligninga og med ho den snikande kjensla: skal det glippe igjen i dag og? Dessverre fekk den kjensla rett. På verst tenkeleg vis sette Odd inn sigersmålet på overtid, og Bryne stod att med null poeng i sin eigen 100-årsjubileumskamp. Det gjorde vondt. Skikkeleg vondt. Som alltid deler me ut børs, kven stod fram, kven må opp eit hakk, og kva kan me ta med oss vidare? Allereie fredag 1. mai ventar ein ny sjanse, når Sogndal kjem til Bryne Stadion. Eit lag som og slit, men som kjem med tre poeng i bagasjen. Dette er ein kamp Bryne må vinne, enkelt og greitt. Me håpar, me trur, og me kjenner på spenninga saman med dykk. Senk skuldrene litt saman med oss i denne episoden, og så håpar me at me sjåast på stadion. Før me rundar av, tek me oss ogtid til å heidre Sverre Sele. Ein ekte heidersmann som har sett djupe spor i klubben. Bli med oss heilt til slutt.

I dagens episode av Edder & Galle er stemninga tung etter endå eit tap, denne gong mot EIK. Tre av tre tap i starten av sesongen gjer at praten fort blir prega av frustrasjon, og gutane prøver å setje ord på kva som eigentleg ikkje fungerer. Dei er innom både spelet, enkeltprestasjonar og mangelen på flyt, og det blir tydeleg at dette ikkje berre kan forklarast med uflaks. I spalta anonyme Snapchat spørsmål slepp lyttarane til med det dei meiner. Her kjem det mange direkte og ufiltrerte spørsmål, og fleire er opptekne av ein situasjon som skjedde etter kampen. Duoen meiner sjølv at den har blitt blåst litt ut av proporsjonar, og dei gir sitt syn utan å legge så mykje imellom. Elles går det i spørsmål om kva som bør endrast, både taktisk og i laget, og svara er like ærlege som spørsmåla. Mot slutten snakkar dei om helga og jubileumskampen til Bryne. Det blir jubileumsdrakt og opplegg før kamp i Telt E utanfor stadion. Kampstart er klokka 20:00, så her handlar det berre om å få seg billett og møte opp. Sjølv om starten har vore tung, er bodskapen klar, dei har ikkje gitt opp, og håpar mange andre heller ikkje har gjort det.