異鄉90後 | 廣東話podcast

細個成日覺得大人好煩： 點解買嘢要格價？ 點解咁鍾意關心人哋食乜、做乜？ 點解朋友講自己嘅人生，大人總係忍唔住要畀意見？ 以前覺得「關你咩事」，人大咗先發現，自己好似慢慢都變成嗰個人： 工作上開始冇以前咁搏，覺得「做到咪算」； 買嘢開始識格價，幾蚊都想慳； 聽到朋友遇到問題，開始忍唔住有自己嘅睇法； 甚至一句「都係為你好」，以前最憎聽，而家自己都有機會講出口。 究竟我哋係變得市儈、固執，定係只係經歷多咗現實之後，開始有另一套價值觀？ 今集就由「30幾歲之後，我哋究竟變成咗咩人？」開始講起！ -- Hosting provided by SoundOn

你有冇試過：睇劇睇到一半，覺得太拖，就開始瘋狂快轉；煲幾個鐘湯，就有人問：「煮咁耐，下次唔好咁嘥時間啦！」 我哋好似由細到大都被灌輸咗一個觀念：時間要用得有效率，最好仲要有成果。 但如果你花咗時間喺一啲事情上，雖然冇乜實際成果，卻可以令你開心、放鬆、療癒，咁又算唔算「嘥時間」？ 今集我哋就同大家一齊重新諗吓，香港人口中成日講嘅「浪費時間」！ -- Hosting provided by SoundOn

早前有位準新娘想搞adult only婚禮，卻引起想帶小朋友參加婚禮嘅親戚不快，當事人喺threads吐苦水之後引發一場小風波。由婚禮限制鬧劇、紅白事相衝嘅迷信，講到輩分階級嘅枷鎖—點解亞洲人生活好似總係要「做俾人睇」，活得咁辛苦？今集《異鄉90後》，我哋一齊傾吓呢啲困住大家嘅「亞洲人情世故」! -- Hosting provided by SoundOn

忍咗幾個月，今集《異鄉90後》終於可以公開 PY 移英呢件事！明明喺台灣已經建立好生活，點解 PY 仲要搬去英國？ 今次搬走，唔係因為生活過得唔好，亦冇一個非常明確嘅目標，一切都係從呢個問題開始：「如果10年、20年後，我繼續留喺度，我會過緊一個點樣嘅人生？」 去到新地方，未必即刻搵到答案，但至少可以知道原來人生仲有其他可能。 今集《異鄉90後》，我哋由 PY 移英出發，傾下重新開始、退路、適應新環境，同埋點樣喺人生已經建立好一切之後，仍然有勇氣再試一次！ -- Hosting provided by SoundOn

古語有云：「讀萬卷書，不如行萬里路。」今集嘉賓阿Mac就由15歲開始踏出香港，走遍歐美留學，最後更成功喺美國發展事業。 留學真係有錢人嘅專利？原來唔少海外交流同留學計劃都設有獎學金，幫助年輕人走出世界，開闊眼界。究竟有咩方法？又點樣改變咗阿Mac嘅人生？今集《異鄉90後》同你一齊傾！ -- Hosting provided by SoundOn

不知不覺，《異鄉90後》嚟到第100集！🥳 今集亦終於請到第一位真正長住英國倫敦嘅嘉賓——Carrie，同大家分享佢移英4年嘅真實經歷。 由香港Luxury/ Retail Marketing轉戰英國銀行做Local Marketing，Carrie會同大家傾吓移民後點樣重新適應當地生活、打入英國職場，以及香港人最常遇到嘅文化差異。英國生活係咪真係想像中咁美好？Central London 近年治安變化有幾大？點解英國人咁重視Small Talk？廣告文化又點解咁鍾意「串人」？ 由飲食、語言、職場文化，到準備移英前應該點裝備自己，今集一次過分享。另外，PY亦會喺第100集公布一個新消息，到底係咩新計劃？答案就喺今集《異鄉90後》！ -- Hosting provided by SoundOn

講到移民，我哋成日聚焦喺離開嘅人身上——佢哋點適應新生活、點面對思鄉、點重新開始。但其實，留低嘅人又何嘗唔係經歷緊另一場離別？ 今集我哋邀請舞台劇《候鳥》演員蒙潔，一齊傾吓「去」與「留」背後嘅故事。當身邊嘅人一個個離開，作為留下來的人，應該點樣作出自己嘅選擇？曾經親密嘅關係，又會因為距離而變成點樣？候鳥會遷徙，留鳥會守候，但彼此之間，仲可以點樣靠近？ -- Hosting provided by SoundOn

每逢長假，就算只有三日，不少香港人都會即刻計劃外遊，就算只係去深圳、澳門，都照樣衝出去！🤔 但Catherine去咗韓國生活之後，竟然反而少咗想去旅行，甚至開始享受留喺當地慢慢生活。究竟係咩令佢心態有咁大轉變？香港人點解又特別鍾意一放假就離港？你又係「放假一定要飛」定係「留喺屋企最舒服」派？今集《異鄉90後》我哋同大家一齊傾下！ -- Hosting provided by SoundOn

（本集含少量劇情簡介，無劇透，請放心收聽🎧） 一個問題學生變成今日咁，到底係邊個造成？老師冇能力？學生太失控？家長縱容？定其實係成個教育制度出咗問題？ Netflix《鐵拳教育》表面講校園暴力，但其實更想討論教師教權、怪獸家長、網絡輿論，以至整個社會點樣一步步形成今日嘅教育困境。有韓國地方政府甚至諗住參考劇情，研究保護教權嘅措施。但教育問題真係可以靠一兩條政策解決？ 今集《異鄉90後》，我哋由《鐵拳教育》出發，一齊討論教育、家庭同社會之間嘅連鎖效應。 -- Hosting provided by SoundOn

唔少人移民後，都會經歷職業同收入上嘅巨大轉變。有人做唔返原本嘅工作，有人要由低做起，甚至要接受收入比以前少一大截。但最難面對嘅，未必係人工少咗，而係原本建立多年嘅自我價值同安全感，好似一夜之間被打散。當連最基本嘅開飯錢都要重新努力爭取，難免會問自己：究竟我仲有無價值？當初嘅決定係咪正確？ PY同Catherine都曾經有類似嘅諗法，最後究竟係點樣調整心態？一齊嚟聽吓今集《異鄉90後》！ -- Hosting provided by SoundOn

**收聽今集節目時切勿飲食😂 某個韓國綜藝將「食蛇」當成大懲罰，令我哋發現——原來好多香港人食開、覺得好平常嘅食物，對外國人嚟講分分鐘係完全接受唔到😳 由雞腳、內臟、皮蛋、臭豆腐，到一啲連香港人自己都未必頂得順嘅食物，究竟有咩係香港人覺得無問題，但外國人一見就卻步？又有啲嘢食，其實香港人同外國人都一致覺得「真係唔得」？今集《異鄉90後》一齊講吓最令人無法接受嘅飲食文化差異！ -- Hosting provided by SoundOn

異鄉90後不知不覺已經過咗兩周年啦🥳今集我哋邀請到重量級嘉賓胡希文 Yoyo，同大家分享去年參演韓國音樂劇《初雪》嘅幕後點滴。由收到演出邀請、學習韓文、同韓國劇組排練，到製作規模同正式公演嘅經歷，Yoyo 都會一一同大家細說。原來喺韓國排音樂劇，最大挑戰未必係唱歌跳舞，而係個肝？🤔 究竟發生咩事，就要留意今集《異鄉90後》啦！ P.S.特別鳴謝游大東促成今次訪問！ -- Hosting provided by SoundOn

而家嘅學習模式同十幾年前好大分別，以前tablet唔俾帶返學校，而家幾乎人人帶一部返學，仲有用AI、補習等等。不過學習方法點變，最緊要係有嘢落到袋。究竟呢啲改變係好事定壞事，定係冇所謂？🤔 咁就要聽今集《異鄉90後》啦！ -- Hosting provided by SoundOn

自己支持嘅球隊贏波開心，買到個靚袋開心，食到好嘢又開心😌 雖然話做人最緊要開心，但係咪一定要一日到黑都咁開心？長期處於咁開心嘅情緒係咪好事？有研究指出，長期處於高能量反而係情緒響起警號🧐 今集《異鄉90後》就同大家講吓對快樂嘅睇法！ -- Hosting provided by SoundOn

早幾年移民潮嘅時候，移民KOL好似雨後春筍咁樣出現。但係時間耐咗，有部份KOL引發各種爭議，例如資訊不足、角度過於偏頗，或者變咗做廣告Channel等等。究竟我哋決定移居移民之前，應該點樣選擇適合嘅資訊？而呢啲KOL係咪完全冇用？咁就要聽我哋今集《異鄉90後》討論移民KOL啦～ -- Hosting provided by SoundOn

最近日本收緊永居政策，搞到唔少外國人叫苦連天。其實唔止日本，唔少地方嘅簽證條件越收越緊。雖然有唔少職位而家主要都係由外國人擔任，但咁嘅政策變化似乎將外國人拒於門外，同時又有啲吸納外國人才嘅政策到頭嚟成效甚微。究竟係咪真係需要外國人？我哋真係睇唔透🤷‍ -- Hosting provided by SoundOn

細個嘅時候，我哋成日覺得旗袍、裙褂、舊時代歌手呢啲嘢好老土，但係人大咗，反而開始慢慢欣賞到當中嘅美。可能係因為身處異地，用咗另一個角度去重新理解；又或者係經過新嘅包裝同演繹，先令我哋重新發現佢哋嘅價值。究竟係我哋變咗，定係佢哋變咗？今集《異鄉90後》同大家一齊講下「老土變寶」😌 -- Hosting provided by SoundOn

近年愈來愈多人開始享受一個人嘅時間，例如自己去旅行、食 lunch、甚至一個人揸車周圍走。獨處好似變成一種生活方式，唔單止可以放鬆自己，亦同城市節奏同居住環境（例如香港嘅土地供應）有關。不過，當「一個人」變成習慣，甚至開始依賴，會唔會對人際關係產生影響？今集《異鄉90後》就同大家傾吓一個人嘅時間！ -- Hosting provided by SoundOn

喺韓國生活耐咗，慢慢會發現由用微波爐、換毛巾，到搭公共交通工具，都有一啲幾「韓國式」嘅生活習慣。有啲令人睇到一頭霧水，有啲又覺得幾貼心，甚至希望佢哋可以一直保留落去。今集《異鄉90後》叫埋 嘉賓Celia，一齊同大家拆解幾個韓國人日常中又奇怪又有趣嘅小習慣！ -- Hosting provided by SoundOn

同長輩去旅行一向都係高難度挑戰，呢樣又唔like，嗰樣又唔適應🫩所以除咗衣食住行要準備周到，近年唔少人分享心得應付長輩，究竟呢啲心得係唔係work呢？無曬自由時間、對付長輩分分鐘仲攰過返工，點解仲要同長輩去旅行？今集異鄉90後PY同埋Catherine 同大家分享吓帶長輩旅行嘅親身經歷、仲有獨門秘訣！ -- Hosting provided by SoundOn